Federata Shqiptare e Futbollit ka përzgjedhur një ekspert spanjoll për të drejtuar Departamentin e Arbitrimit.
FSHF-ja prezantoi të premten Bernardino Gonzalez Vazquezin si drejtorin e ri të këtij departamenti.
Vazquez ka një përvojë të gjatë si arbitër në La Liga dhe si gjyqtar ndërkombëtar, ndërsa gjatë karrierës së tij ka mbajtur edhe poste drejtuese në strukturat e arbitrimit.
Pas emërimit, ai ka theksuar se puna do të jetë çelësi kryesor për zhvillimin e mëtejshëm të arbitrave shqiptarë.
“Çelësi në arbitrim, por edhe në jetë, është puna. Në Spanjë kemi një shprehje: sa më shumë të punosh, aq më me fat je”, ka deklaruar Vazquez.
Ai ka shtuar se synimi i tij është të jetë pranë arbitrave shqiptarë dhe t’i ndihmojë ata në rritjen dhe përmirësimin profesional.
“Mesazhi im për arbitrat shqiptarë është shumë i thjeshtë: unë do të jem njëri prej jush dhe do të bëj më të mirën që ju të rriteni, të përmirësoheni dhe të zhvilloheni”, ka thënë ai.
Emërimi i një eksperti të huaj në krye të arbitrimit nuk është rast i izoluar, pasi edhe federata të tjera kanë ndjekur një qasje të ngjashme.
