Barcelona reagon ashpër nëpërmjet një komunikate, kërkon hetim nga UEFA

Barcelona ka njoftuar se ka paraqitur një ankesë zyrtare pranë UEFA lidhur me ngjarjet e ndodhura në ndeshjen e parë të çerekfinales së UEFA Champions League kundër Atlético de Madrid.

\Sipas komunikatës së klubit katalanas, shërbimet juridike të Barcelonës e konsiderojnë se gjatë kësaj ndeshjeje ka pasur një vendimmarrje arbitrare në kundërshtim me rregulloren aktuale, e cila ka ndikuar drejtpërdrejt në zhvillimin e lojës dhe rezultatin përfundimtar.

Në qendër të ankesës është një episod i minutës së 54-të, kur, sipas Barcelonës, një lojtar i ekipit kundërshtar ka prekur topin me dorë brenda zonës pas rifillimit të rregullt të lojës, pa u akorduar penalltia përkatëse.

Klubi pretendon se kjo situatë përbën një gabim të rëndë, i cili rëndohet edhe më shumë nga mosndërhyrja e sistemit VAR.

Si pjesë e kërkesës së saj, Barcelona ka kërkuar hapjen e një hetimi të plotë mbi rastin, qasje në komunikimet e arbitrave gjatë ndeshjes, si dhe nëse konstatohen shkelje, njohjen zyrtare të gabimeve dhe marrjen e masave përkatëse.Sipas tyre, në edicionet e fundit të Champions League, vendime të ngjashme arbitrare kanë dëmtuar vazhdimisht ekipin, duke krijuar një disavantazh të dukshëm krahasuar me klubet e tjera dhe duke penguar konkurrencën e barabartë në arenën evropiane.