Alarm për Egjiptin, Salah rrezikon të humbasë duelin me Australinë

Kapiteni i Egjiptit, Mohamed Salah, është në dyshim për ndeshjen e së premtes ndaj Australisë në fazën e 1/16 së finales të Kupës së Botës, pasi ka pësuar një dëmtim në muskulin e pasëm të kofshës (hamstring).

34-vjeçari u zëvendësua gjatë barazimit 1-1 të Egjiptit me Iranin, ndërsa mjeku i kombëtares, Mohamed Abou, bëri të ditur se Salah kishte ndier dhimbje para se ekzaminimet mjekësore të konfirmonin një tendosje të hamstringut.

Në njoftimin e Federatës Egjiptiane të Futbollit thuhet se Salah ka nisur programin e trajtimit, por nuk është dhënë asnjë indikacion nëse sulmuesi do të jetë gati për sfidën ndaj Australisë, e cila do të zhvillohet më 3 korrik në Dallas.

“Fola me Salahun dhe, me ndihmën e Zotit, dëmtimi nuk duket serioz,” deklaroi trajneri i Egjiptit, Hossam Hassan, pas ndeshjes me Iranin.

“Ai më siguroi se gjithçka do të jetë në rregull dhe se nuk bëhet fjalë për një dëmtim serioz.”

Një problem i ngjashëm në hamstring e mbajti ish-yllin e Liverpoolit jashtë fushave për tre javë në fund të muajit prill, por ai u rikuperua në kohë për të luajtur në dy ndeshjet e fundit të sezonit.

Deri tani në këtë Kupë Bote, Salah ka shënuar një gol dhe ka dhuruar dy asistime, duke ndihmuar Egjiptin të kualifikohet nga Grupi G në vendin e dytë.