SHBA pa emër ambasadori vetëm për Kosovën, Hovenier: S’është sinjal për rëndësinë që ka Kosova për politikën amerikane

Vetë ish-ambasadori Jeff Hovenier, në një përgjigje për Gazetën Express ka thënë se fakti që SHBA ka nominuar emrat për Serbi, Mal të Zi e Bosnje e Hercegovinë dhe jo për Kosovën, nuk është reflektim i rëndësisë që Kosova ka për Amerikën.

Sipas diplomatit amerikan, përzgjedhja e një emri për ambasador është çështje tejet burokratike dhe mund të marrë shumë kohë.

Hovenier këshillon që të mos i jepet më shumë vëmendje sesa duhet kësaj çështjeje në këtë moment.

“Do të këshilloja të mos i jepet shumë rëndësi mungesës së një nominimi për Ambasadorin e SHBA-së në Kosovë në këtë moment. Procesi i përzgjedhjes, verifikimit dhe nominimit formal të një ambasadori përfshinë shumë hapa burokratikë dhe shpesh mund të zgjasë mjaft kohë. Fakti që së fundmi janë shpallur kandidatë për Serbinë, Malin e Zi dhe Bosnjën thjesht pasqyron fazën në të cilën ndodhen ato kandidatura të veçanta në proces. Kjo nuk duhet të interpretohet si një sinjal për rëndësinë që Kosova ka në politikën e SHBA-së.”, ka thënë Hovenier për Gazetën Express.

Megjithatë për këtë çështje ka shfaqur shqetësim të madh kongresisti amerikan, Ritchie Torres. Në një përgjigje për Express të mërkurën, Torres ka thënë së Administrata e Trump ka bërë gabim të rëndë që nuk ka nominuar një ambasador për Kosovën dhe ka kërkuar që të veprohet në drejtim të caktimit të një emri.