Numërimi i votave të diasporës drejt fundit, kjo është rënditja e partive

Sot pritet të përfundojë numërimi i të gjitha votave të diasporës.

Këtë e bëri të ditur zëdhënësi i Komisionit Qendror të Zgjedhjeve, Valmir Elezi.

Ai u shpreh se pas përmbylljes së këtij numërimi të martën, do procesohet me numërimin e fletëvotimeve të votimit me kusht, dhe numërimit të votave të personave me nevoja të veçanta.

Komisioni Qendror i Zgjedhjeve ka procesuar rezultatetet nga numërimi i 90.37 përqind e votave të mërgatës nga votimi përmes postës. Rezultatet e proceduara janë nga 169 kuti prej 187 sa janë gjithsej.

Sipas këtyre rezultateve, Lëvizja Vetëvendosje prin me 51.70 përqind e votave apo 28 mijë e 593 vota.

Pas VV’së, renditet Lidhja Demokratike e Kosovës me 30.15 përqind e votave apo 16 mijë e 673 vota, pasuar nga Partia Demokratike e Kosovës me 9.52 përqind apo 5 mijë e 266 vota.

Aleanca për Ardhmërinë e Kosovës renditet e katërta me 3.09 përqind e votave apo 1 mijë e 707 vota.