Zbatimi i reformave të përcaktuara nga Plani i Rritjes i Bashkimit Evropian për Ballkanin Perëndimor po zhvillohet me ritme të ngadalta në Kosovë. Mosrespektimi i detyrimeve brenda afateve mund të sjellë edhe humbjen e mjeteve të ndara për vendin.
Të dhënat e publikuara nga WeBalkans tregojnë se shtetet e Ballkanit Perëndimor kanë shënuar nivele të ndryshme përparimi, ndërsa Kosova dhe Bosnjë e Hercegovina renditen në fund sa i përket realizimit të reformave.
Nga shuma fillestare prej 882.6 milionë eurosh e paraparë për Kosovën përmes Planit të Rritjes, deri tani vendi ka përfituar 61.8 milionë euro.
Materiali, të cilit i referohet KosovaPress, thekson se pas aprovimit të Agjendës së Reformave nga Komisioni Evropian, Kosova ka filluar të miratojë legjislacion të ri, të zbatojë ndryshime institucionale, të digjitalizojë administratën publike dhe të avancojë menaxhimin e financave publike. Megjithatë, ecuria e këtij procesi vlerësohet si e ngadaltë.
Një zëdhënës i Komisionit Evropian, i cituar në publikimin e WeBalkans, ka njoftuar se vetëm Kosova dhe Bosnjë e Hercegovina nuk e kanë dorëzuar ende raportimin zyrtar mbi zbatimin e reformave.
“Vetëm Bosnjë e Hercegovina dhe Kosova nuk kanë raportuar ende formalisht për zbatimin e reformave”, ka thënë zëdhënësi i Komisionit Evropian.
Brukseli ka sqaruar se disbursimi i fondeve është i lidhur me përmbushjen e reformave për të cilat është rënë dakord, ndaj vendet e rajonit duhet t’i realizojnë detyrimet brenda afateve të caktuara.
Duke përcjellë qëndrimin e Komisionit Evropian, në material thuhet se “Pagesat janë të kushtëzuara me përmbushjen e hapave të reformave”.
