Presidenti i SHBA-së, Donald Trump, e ka quajtur të dielën presidentin kolumbian, Gustavo Petro, një “udhëheqës të paligjshëm të drogës” dhe ka thënë se Shtetet e Bashkuara do të ndalonin “pagesat dhe subvencionet në shkallë të gjerë” për kombin e Amerikës së Jugut.
“Petro … është një udhëheqës i paligjshëm i drogës që inkurajon fuqimisht prodhimin masiv të drogës”, ka shkruar Trump në Truth Social.
“Qëllimi i këtij prodhimi droge është shitja e sasive masive të produktit në Shtetet e Bashkuara, duke shkaktuar vdekje, shkatërrim dhe kaos”, ka shtuar ai.
Marrëdhëniet midis Bogotës dhe Uashingtonit janë përkeqësuar që kur Trumpi është kthyer në detyrë.
Muajin e kaluar Shtetet e Bashkuara i revokuan vizën Petros pasi ai u bashkua me një demonstratë pro-palestineze në New Jork dhe u bëri thirrje ushtarëve amerikanë të mos i bindeshin urdhrave të Trumpit.
Vitin e kaluar, Petro ishte zotuar të reduktonte rajonet e kultivimit të kokainës në Kolumbi me ndërhyrje masive sociale dhe ushtarake, por strategjia ka sjellë pak sukses.
Në shtator, Trumpi ka caktuar një listë të re vendesh si Afganistani, Bolivia, Burma, Kolumbia dhe Venezuela, midis atyre që Shtetet e Bashkuara besojnë se kanë “dështuar në mënyrë të dukshme” në mbështetjen e marrëveshjeve kundër narkotikëve gjatë vitit të kaluar.
Ai ka fajësuar udhëheqjen politike të Kolumbisë për dështimin në përmbushjen e detyrimeve të saj për kontrollin e drogës.
