Të akuzuarit për zjarrin tragjik në Koçan, që la 63 të vdekur, dalin para gjyqit

Sot, kanë dalë në gjyq, më shumë se 30 persona, të akuzuar për shkelje të sigurisë publike lidhur me vdekjen e 63 personave nga një zjarr në klubin e natës “Pulse” në Koçan të Maqedonisë së Veriut në mars.

Zjarri u shkaktua nga fishekzjarrë të ndezur gjatë një performance hip hop, të cilat i vunë flakën tavanit të klubit të mbushur plot, për të cilin autoritetet thanë se nuk kishte licencë të duhur, dalje emergjente të mjaftueshme ose fikëse zjarri. Të vdekurit ishin kryesisht të rinj, ndërsa rreth 170 persona të tjerë mbetën të lënduar, raporton Reuters.

Të mërkurën, të dyshuarit u sollën të prangosur nga burgu në sallën e gjyqit në kryeqytetin Shkup. Dhjetëra anëtarë të familjeve të viktimave morën pjesë në seancë.

Sipas agjencisë MIA, 35 persona dhe tri subjekte juridike janë paraqitur në gjyq. Ata akuzohen për rrezikim të sigurisë publike dhe mosrespektim të procedurave të sigurisë, dhe përballen me dënime nga 10 vjet burg deri në burgim të përjetshëm.

Aktakuza përfshin pronarin e klubit të natës, një kompani private sigurie, një kompani ndërtimi të përfshirë në modifikime, si dhe inspektorë, nëpunës civilë, oficerë policie, punëtorë ndërtimi dhe punonjës të klubeve. Emrat e tyre nuk u bënë publik.

Aktakuza u lexua të mërkurën në gjykatë, ndërsa të pandehurit ende nuk kanë dhënë ndonjë deklaratë. Ende nuk dihet se sa do të zgjasë gjyqi.