Sulm me armë zjarri në një plazh në Sydney, raportohet për 10 viktima

Një sulm ka ndodhur të dielën në një plazh në Sydney, ku policia australiane ka ndërhyrë pas raportimeve për të shtëna me armë zjarri.

Autoritetet dhe mediat raportojnë se të paktën 10 persona janë vrarë, përfshirë një prej sulmuesve, dhe të paktën 12 të tjerë janë plagosur dhe dërguar në spitale.

Ngjarja ka ndodhur në Bondi Beach, një nga zonat më të frekuentuara turistike të qytetit.

Banorëve dhe vizitorëve iu kërkua të shmangnin zonën, pasi situata u cilësua si ende në zhvillim.

Policia konfirmoi se dy persona janë ndaluar në lidhje me incidentin, ndërsa hetimet po vazhdojnë për të sqaruar rrethanat dhe motivet e sulmit.