Sekuestrohet në Qerret apartamenti i ish-anëtarit të Vetëvendosjes, i dyshuar për trafikim të heroinës

Prokuroria e Posaçme kundër Korrupsionit dhe Krimit (SPAK) në Shqipëri ka sekuestruar një apartament që ndodhej në pronësi të Shemsi Bahtirit, ish-anëtarit të Lëvizjes Vetëvendosje dhe një bosi të dyshuar të drogës.

Apartamenti i të dyshuarit për trafikim të narkotikëve – i cili aktualisht është i paraburgosur në Kosovë – ndodhej në bregdetin shqiptar në Qerret të Kavajës.

Sekuestrimi nga SPAK i pronës së Bahtirit ka ardhur me kërkesë të Prokurorisë Speciale në Kosovë, shkruan të enjten portali VNA.al , pasi kishte dyshime të forta se paratë e drogës i kishte investuar në pasuri të paluajtshme në Shqipëri.

Por, SPAK ka arritur të verifikojë vetëm apartamentin në Qerret si pronë nën pronësinë e Bahtirit.

Shemsi Bahtiri u arrestua në një aksion masiv të Prokurorisë Speciale dhe Policisë së Kosovës më 3 qershor të vitit 2025, të koduar nën emërtimin “Qielli i Thyer”. Bahtiri u arrestua nën dyshimet për trafikim të heroinës dhe shpëlarje të parave.

Pas arrestimit, në rrjetet sociale u shfaqën fotografi të tij në shoqërinë e Xhelal Sveçlës, ministrin e Punëve të Brendshme dhe të tjera imazhe e tregonin atë brenda zyrave të Lëvizjes Vetëvendosje.

Bahtiri ishte prej kohësh anëtar i Vetëvendosjes. Një ditë pas arrestimit, më 4 qershor, Lëvizja Vetëvendosje e përjashtoi nga partia “bosin e drogës”.

Pjesë e të njëjtit hetim të Prokurorisë Speciale ishte edhe Brilant Bahtiri, djalin e Shemsi Bahtirit. Por, që nga qershori i vitit të kaluar ai ndodhet në arrati nga organet e rendit dhe të drejtësisë.

Pas operacionit, Policia e Kosovës sekuestroi në Kosovë dy vetura luksoze në pronësi të Brilant Bahtirit.