Zjarri detyron qindra turistë të evakuohen përmes detit në Greqi, flakët përfshijnë Evropën

Një mur zjarri i gjatë rreth 3 kilometra dhe 30 metra i lartë detyroi qindra turistë në veri të Greqisë të futeshin në det, ndërsa zjarre të fuqishme përfshinë edhe Kroacinë, Francën dhe Britaninë e Madhe, të nxitura nga vala e të nxehtit ekstrem.

Mbi 200 zjarrfikës, avionë ujëhedhës dhe helikopterë u angazhuan për rreth katër orë për të vënë nën kontroll zjarrin që shpërtheu në gadishullin e Halkidikisë, në jug të Selanikut, dhe u përhap drejt resorteve turistike Siviri dhe Fourka, të mbushura me pushues.

Pasi e vlerësuan evakuimin përmes rrugëve tokësore si shumë të rrezikshëm, autoritetet transportuan rreth 500 turistë me varka të vogla dhe mjete të rojes bregdetare. Ndërkohë, personat që tentuan të largoheshin me automjete mbetën të bllokuar në trafik.

Dy zjarrfikës u shtruan në spital, ndërsa autoritetet ndaluan qasjen e publikut në zonat pyjore me pisha. Meteorologët paralajmëruan për erëra të forta, me shpejtësi deri në 100 kilometra në orë.

Zjarri më vonë u vu nën kontroll, por ekipet e emergjencës qëndruan në gatishmëri për shkak të rrezikut të riaktivizimit të vatrave.

Ndërkohë, mbi 150 zjarrfikës luftuan me flakët që u përhapën me shpejtësi nga një pyll me pisha në qytetin turistik Lokva Rogoznica të Kroacisë, duke përfshirë shtëpi dhe automjete.

Rreth 1 mijë banorë të zhvendosur u strehuan në një pallat sporti në qytetin e afërt të Omišit, ndërsa një rrugë që çonte drejt bregdetit u mbyll për arsye sigurie, duke shkaktuar kolona të gjata automjetesh.

Në Francë, autoritetet shpallën të premten alarmin maksimal në katër rajone, duke paralajmëruar se kushtet e motit kanë rritur ndjeshëm rrezikun e shpërthimit dhe përhapjes së zjarreve.

Në Mbretërinë e Bashkuar, një zjarr me disa vatra shkrumboi shtëpi në afërsi të Stourbridge, rreth 9 kilometra larg Birminghamit, në një ditë që u konsiderua ndër më të nxehtat e vitit.

Flakët përfshinë gjithashtu gjashtë prona private dhe detyruan shumë banorë të evakuoheshin.

Pothuajse tre të katërtat e Anglisë ndodhen në kushte thatësire, ndërsa kryeministri Andy Burnham u ka bërë thirrje shitësve të kufizojnë shitjen e pajisjeve për barbekju, për shkak të rrezikut të shtuar nga zjarret.