Analisti gjerman dhe anëtar i Democratization Policy Council (DPC), Bodo Weber, ka vlerësuar se plani franko-gjerman, i njohur si Marrëveshja Bazike dhe Aneksi i Ohrit, përfaqëson iniciativën më të dëmshme në historinë e dialogut të ndërmjetësuar nga Bashkimi Evropian mes Kosovës dhe Serbisë.
Në një intervistë për Gazetën Express , Weber ka theksuar se kjo marrëveshje është më problematike edhe sesa ideja e korrigjimit të kufijve apo shkëmbimit të territoreve ndërmjet dy vendeve.
Sipas tij, Brukseli ka dështuar të ndërtojë një dialog të thellë dhe strategjik, i cili do të çonte drejt një marrëveshjeje gjithëpërfshirëse dhe përfundimtare, me njohjen e plotë dhe formale të Kosovës nga Serbia.
“ Iniciativa gjermano-franceze/Marrëveshja Bazë&Ohri mbetet iniciativa më e keqe dhe më e dëmshme në historinë e dialogut politik të udhëhequr nga BE-ja, më e dëmshme edhe se episodi i shkëmbimit të territoreve. Në vend të një dialogu të thellë dhe strategjik, të rivendosur drejt negociatave për një marrëveshje vërtet gjithëpërfshirëse dhe përfundimtare me njohjen e plotë dhe formale të Kosovës nga Serbia në thelb, duke filluar me rindërtimin e besueshmërisë dhe autoritetit të BE-së ndaj Prishtinës dhe Beogradit pas vitit 2020, Brukseli (Berlini) zgjodhi një qasje jostrategjike të ngatërrimit ”, ka deklaruar Weber.
