Visar Xani i bashkohet ekipit të Vjosa Osmanit për zgjedhjet e 7 qershorit

Vjosa Osmani ka bërë të ditur se listës së saj për zgjedhjet e 7 qershorit i është bashkuar edhe analisti Visar Xani.

Në një postim në Facebook, Osmani ka prezantuar Xanin si një nga kandidatët për deputetë, duke vlerësuar përvojën e tij shumëvjeçare në media, analizë politike dhe shërbim publik, shkruan Demos.

Ajo ka theksuar se Xani vjen nga një brez që ka ndjekur nga afër zhvillimet e Kosovës në periudha të rëndësishme të shtetndërtimit dhe debatit publik.

“Visari i përket atij brezi që e njohu Kosovën në lëvizje, në debat, në përpjekjen e saj të vazhdueshme për t’u bërë shtet më i fortë e më i drejtë. Fillimisht si gazetar e analist politik, me syrin kritik ndaj zhvillimeve shoqërore e politike, e më pas brenda vetë institucioneve, aty ku fjala duhet të shndërrohet në përgjegjësi dhe puna në rezultat.

Në organizata ndërkombëtare dhe në administratë publike, Visari ka sjellë qetësinë e njerëzve që e kuptojnë shtetin si një projekt në të cilin duhet të punohet ditë pas dite. Visari ka kontribuar në reforma, në komunikim institucional dhe në formimin profesional të shumë zyrtarëve në Kosovë, në veçanti me rolin e tij si Koordinatori Nacional i RESPA-s për Kosovën.

Mbi të gjitha, ai sjell një cilësi që rrallë thuhet, por lehtësisht dallohet: seriozitetin e njeriut që e sheh shërbimin publik si detyrim ndaj qytetarëve dhe jo si privilegj.

I nderuar Visar, na priftë e mbara në këtë rrugëtim të përbashkët!”, ka shkruar Osmani.