Ka ndërruar jetë Basri Mehmet Kelmendi, me prejardhje nga Skenderaj, i cili jetonte në Firence të Italisë. Ai ndërroi jetë pas një sëmundje të rëndë.
Lajmi për vdekjen e tij është bërë i ditur nga familja Kelmendi, përmes një njoftimi mortor, ku kanë shprehur dhimbjen e thellë për humbjen e më të dashurit të tyre.
Sipas amanetit të lënë nga Basriu, ai do të prehet pranë varreve të gjyshit dhe gjyshes së tij, në vendlindje, në Kosovë.
Trupi i të ndjerit do të udhëtojë nga Italia drejt Kosovës, ndërsa familja ka bërë të ditur se ende nuk dihet data e arritjes së tij. Për kohën e varrimit dhe të pameve, familjarët do të njoftojnë me kohë.
Njoftimi:
NJOFTIM MORTOR
Me dhimbje të thellë njoftojmë familjarët, miqtë dhe të gjithë të afërmit se sot, në Firence të Italisë, pas një sëmundjeje të rëndë, ndërroi jetë më i dashuri ynë, Basri Mehmet Kelmendi.
Sipas amanetit të tij, të lënë vetëm pak ditë para se të ndahej nga jeta, Basriu do të prehet pranë varreve të Babushit (gjyshit) dhe nanës Hime (gjyshes), në vendlindje, në Kosovë.
Basriu do të udhëtojë për herë të fundit nga Italia drejt Kosovës, duke përshkuar edhe një herë rrugën të cilën e bënte sa herë vinte për të kaluar çaste të bukura me familjen dhe për t’u bashkuar me më të dashurit e tij.
Meqenëse ende nuk dihet data e arritjes së trupit në Kosovë, për kohën e varrimit dhe të pameve do t’ju njoftojmë me kohë.
Ndarja e Basriut na la të pikëlluar dhe me zemër të thyer të gjithë familjarët Kelmendi, veçanërisht prindërit Mehmetin dhe Miradijen, bashkëshorten Marigonen, djalin Erik, vëllain Besnik me familje, si dhe të gjithë të afërmit, miqtë dhe dashamirët.
I dashur Basri, amanetin do ta çojmë në vend.
U prehsh në paqe dhe qofsh i përjetshëm në kujtimet dhe zemrat tona!
Familja Kelmendi