Ish-presidenti amerikan, George W. Bush, ka kujtuar zëvendëspresidentin e tij, Dick Cheney, i cili ka ndërruar jetë të hënën, duke e cilësuar vdekjen e tij si një humbje të madhe për kombin.
Në deklaratën e tij, Bush ka thënë se “vdekja e Cheney është një humbje për kombin dhe një pikëllim për miqtë e tij”.
“Unë dhe Laura do ta kujtojmë Dick Cheney për njeriun e mirë dhe të ndershëm që ishte. Historia do ta kujtojë atë si ndër nëpunësit më të mirë publikë të gjeneratës së tij – një patriot që solli integritet, inteligjencë të lartë dhe seriozitet në çdo pozicion që mbajti”, thuhet në deklaratën e Bushit.
Ish-presidenti ka përshkruar edhe momentin kur kishte kuptuar se Cheney do të ishte zëvendësi i tij më i mirë.
“Në diskutimet tona të gjata rreth cilësive që duhet të ketë një zëvendëspresident – përvojë të thellë, gjykim të pjekur, karakter, besnikëri – kuptova se Dick Cheney ishte ai që më duhej. Jam ende mirënjohës që ai ishte në krahun tim për tetë vjetët që pasuan. Dick ishte një prani e qetë dhe e qëndrueshme në Shtëpinë e Bardhë mes sfidave të mëdha kombëtare. Unë mbështetesha tek ai për këshillat e tij të ndershme dhe të drejtpërdrejta, dhe ai kurrë nuk dështoi të jepte më të mirën e tij. Ai iu përmbajt bindjeve të tij dhe i dha përparësi lirisë dhe sigurisë së popullit amerikan”, ka shtuar Bush në reagimin e tij.
