U rrah nga Policia, Agim Aliu reagon për dhunën ndaj veteranit të UÇK-së: Shkopinjë policorë janë shkopinj ndaj lirisë

Kryetari i Ferizajt, Agim Aliu, ka dënuar dhunën e ushtruar nga Policia ndaj veteranit dhe invalidit të UÇK-së, Gazmend Bytyçi, si dhe protestuesve të tjerë.

Aliu ka thënë se dhuna policore nuk mund ta thyejë revoltën dhe zërin e qytetarëve kundër, siç e quan ai, “dënimit të luftës së drejtë e çlirimtare”.

“Gazi, heroi i luftës dhe i paqes, nuk ka shkop që thyen trimërinë, atdhedashurinë, shpirtin tënd luftarak e veprën lavdiplote që ia fale lirisë së Kosovës”, ka shkruar Aliu.

Postimi i plotë:

Këta shkopinjë të dhunës së pashembullt policore ndaj veteranit e invalidit të Ushtrisë Çlirimtare të Kosovës, drejtorit të Kulturës, Rinisë dhe Sporteve, shkrimtarit e shokut tonë, Gazmend Bytyçi si dhe protestuesve tjerë, janë shkopinjë policor ndaj lirisë, ndaj zërit të revoltës gjithëpopullore që shpreh mospajtimin e papajtueshmërinë për dënimin e luftës sonë të drejtë e çlirimtare.