Vazhdon gjykimi ndaj Ana Bërnabiqit sipas padisë së Momçillo Trajkoviqit

Sipas padisë së Momçillo Trajkoviqit, kryetarit të Forumit Kombëtar Serb nga Graçanica, sot në Gjykatën e Parë Themelore në Beograd do të vazhdojë gjykimi ndaj kryetares së Kuvendit të Serbisë, Ana Bërnabiq, transmeton Paparaci.

Bërnabiq po gjykohet për shpifje dhe fyerje, ndërsa Trajkoviqi e ka paditur për shkak të një deklarate të dhënë në televizionin në shërbim të regjimit aktual serb “TV Pink”, pas fjalimit të tij në një protestë studentore, të mbajtur vitin e kaluar në Sheshin Sllavia në Beograd.

Gjatë një paraqitjeje në këtë televizion, Bërnabiq atëbotë ka deklaruar se Trajkoviqi „është pasuruar duke ia shitur tokën serbe shqiptarëve“.

Momçillo Trajkoviqi kërkoi para gjykatës që Bërnabiq të paraqesë prova me të cilat do t’i mbështeste pretendimet që i kishte bërë publikisht.

Në seancën e mëparshme, më 18 mars të këtij viti, Ana Bërnabiq nuk u paraqit para gjykatës, ndërsa si arsye për mungesën e saj u përmendën „angazhimet në Bruksel“.

Gjykata ka caktuar për sot seancën e re dhe i ka urdhëruar përfaqësuesit ligjor të Ana Bërnabiqit që ta njoftojë të paditurën se prania e saj personale është e domosdoshme për marrjen në pyetje. Gjykata gjithashtu e ka paralajmëruar të paditurën për pasojat ligjore nëse përsëri nuk i përgjigjet ftesës.