Ukë Blakaj takon familjarë dëshmorësh, veteranë e figura të njohura të luftës: Vlerat e luftës janë themeli i lirisë sonë

Kandidati për kryetar të Istogut nga radhët e AAK-së, Ukë Blakaj, ka njoftuar për një takim të veçantë të zhvilluar sonte me familjarët e dëshmorëve të Ushtrisë Çlirimtare të Kosovës, veteranët dhe invalidët e luftës.

Në këtë takim morën pjesë edhe figura të njohura të luftës dhe çështjes kombëtare, si gjenerali Daut Haradinaj, nënkryetari i OVL-UÇK-së Gazmend Syla, komandanti Naser Shatri, si dhe aktivistët e shquar Idriz Blakaj dhe Nysret Pllana. Gjatë bashkëbisedimit, u diskutua për vizionin dhe zhvillimin e komunës së Istogut.

“Vlerat e luftës janë themeli i lirisë sonë. Ne do t’i mbrojmë dhe do t’i avancojmë ato, duke ndërtuar një Istog që ecën përpara me dinjitet, punë dhe respekt për sakrificën e heronjve tanë,” ka theksuar Ukë Blakaj.

Takimi u vlerësua si një moment i rëndësishëm reflektimi dhe bashkimi, duke forcuar përkushtimin për ruajtjen e vlerave kombëtare dhe zhvillimin e komunës.