Standard për privatësinë në Kosovë: Gjykata vendos se qasja në telefon pa urdhër gjyqësor është kundërkushtetuese

Departamenti Special i Gjykatës Themelore në Prishtinë ka marrë vendim se ekzaminimi i telefonave pa urdhër të gjykatës shkel të drejtën kushtetuese për privatësi. Vendimi shënon një kthesë vendimtare në mbrojtjen e të drejtës kushtetuese dhe vendos një standard të ri për mbrojtjen e të dhënave personale të qytetarëve.

Avokati Faton Fetahu , i cili përfaqësonte klientin Sh.P., ka thënë se ky vendim ndalon praktikën e gabuar dhe të dëmshme të prokurorëve që për më shumë se dy dekada urdhëronin hapjen e telefonave pa leje gjyqësore, në kundërshtim me nenin 36 (3) të Kushtetutës.

“Ky vendim prek secilin prej nesh, sepse telefoni i çdo qytetari është tani i mbrojtur nga ndërhyrjet arbitrare. Siguria juridike rritet, shteti i së drejtës forcohet dhe qytetarët marrin garanci reale se privatësia e tyre nuk mund të shkelet sipas dëshirës së një prokurori,” tha Fetahu.m

Ai theksoi se vendimi është edhe fitore për qytetarët, duke vendosur një precedent që ndalon përdorimin e provave të marra në mënyrë të kundërligjshme dhe nxit korrigjimin e padrejtësive të mëparshme, përfshirë rastin e klientit të tij, i cili qëndroi mbi dy vite në paraburgim mbi bazën e provave që tani u shpallën të paligjshme.

Gjykata në përbërje të kryetarit Lutfi Shala dhe anëtarëve Vesel Ismaili dhe Rrahman Beqiri ka theksuar se fshehtësia e komunikimeve, mesazheve dhe të dhënave personale është e pacenueshme dhe mund të kufizohet vetëm me vendim gjyqësor, në përputhje me proporcionalitetin e qëllimit të hetimit.