Të dielën, më 27 shtator, shqiptarë nga diaspora pritet të mblidhen në disa qytete të Evropës në kuadër të protestave në mbështetje të ish-krerëve të Ushtrisë Çlirimtare të Kosovës dhe kundër vendimit të Dhomave të Specializuara të Kosovës në Hagë.
Protestat organizohen nën moton “Jo në emrin tim”, ndërsa thirrjet për pjesëmarrje janë bërë për shqiptarët në diasporë, me qëllim kundërshtimin e vendimit të gjykatës dhe shprehjen e mbështetjes për ish-krerët e UÇK-së.
Tubimet janë paralajmëruar në disa qytete evropiane, përfshirë Londrën, Oslon, Grazin, Gjenevën, Trevison, Karlsruhen, Lindau dhe Shkupin.
Në Londër, protesta është planifikuar nga ora 15:00 deri në 18:00, në Richmond Terrace, ndërsa në Oslo tubimi pritet të mbahet nga ora 13:00 deri në 14:00 në Eidsvolls Plass.
Në Graz, protesta është paralajmëruar në Hauptplatz në orën 12:00. Në Gjenevë, tubimi do të zhvillohet në Place des Nations duke filluar nga ora 14:00.
