Situata e sigurisë, shefi i Operacioneve të Ushtrisë Zvicerane pritet të vizitojë Kosovën

Shefi i Komandës së Operacioneve të Ushtrisë së Zvicrës, Laurent Michaud, pritet të nis një vizitë në Ballkanin Perëndimor që do të zgjasë nga 30 korriku deri më 2 gusht, gjatë së cilës do të ndalet edhe në Kosovë për të takuar kontingjentin zviceran në kuadër të misionit të NATO-s, KFOR .

Në kuadër të kësaj vizite , Michaud do të udhëtojë edhe në Bosnje-Hercegovinë, ku do të takohet me ushtarët zviceranë që shërbejnë në misionin e Forcës së Bashkimit Evropian (EUFOR).

Gjatë takimeve me trupat, ai do të informohet për situatën e sigurisë në zonat ku janë të vendosura forcat dhe për aktivitetet e ushtrisë zvicerane në këto misione, me fokus të veçantë në rolin e oficerëve zviceranë të atashuar në shtabet ndërkombëtare të KFOR-it.

Përveç takimeve me ushtarët, Laurent Michaud do të zhvillojë edhe takime me ambasadorët e Zvicrës në Kosovë dhe Bosnje-Hercegovinë, si dhe me komandantët e KFOR-it dhe EUFOR-it.