ShBA-së s’i bën përshtypje heqja e taksës nga Kosova, na godet njësoj si Korenë

Taksat e reja të presidentit amerikan, Donald Trump, ndaj më shumë se 90 shteteve, kanë hyrë në fuqi të enjten. Në këtë listë nuk kursehet as vendi ynë, Kosova, me popullsinë më pro-amerikane në botë, bashkë me Korenë.

Mallrat kosovare të eksportuara në Shtetet e Bashkuara nga e enjtja do të ballafaqohen me taksë prej 10 për qind, po aq sa mallrat nga Koreja e Veriut.

Televizioni BBC e ka publikuar listën e plotë të shteteve të cilat do të ngarkohen me taksa. Prej vendeve më të goditura është Brazili. Shumica e mallrave braziliane do të ballafaqohen me taksë prej 50 për qind.

India gjithashtu përballet me taksë prej 50 për qind, që pritet të hyjë në fuqi nga 27 gushti. ShBA-ja ka thënë se kjo masë është për shkak të blerjes së naftës ruse nga India, duke e financuar praktikisht luftën e Moskës në Ukrainë.

Sa i përket Kinës, Uashingtoni e Pekini janë ende duke zhvilluar bisedime dhe janë pajtuar që çfarëdo takse e re të shtyhet deri më 12 gusht.

Në listën e shteteve që do të kenë taksa amerikane janë edhe vendet e rajonit si Serbia (35 për qind), Kroacia (15 për qind), Maqedonia e Veriut (15 për qind) dhe Shqipëria (10 për qind).

Njësoj si Shqipëria, edhe Kosova, Koreja e Veriut dhe Rusia do të ngarkohen me taksë prej 10 për qind për mallrat e tyre, sipas listës së publikuar nga televizioni BBC.

Më 1 gusht, kryeministri në detyrë, Albin Kurti, njoftoi se Kosova e ka hequr taksën prej 10 për qind ndaj mallrave amerikane, por duket se ky vendim nuk ka ndikuar në ndryshimin e qëndrimit të Uashingtonit./Nacionale