Kandidati i Lidhjes Demokratike të Kosovës për kryetar të Junikut, Ruxhdi Shehu, ka reaguar pas vendimit të Gjykatës Supreme të Kosovës, e cila ka refuzuar ankesën e degës lokale të AAK-së për listën e votuesve në qytet, shkruan Insajderi.
Në një postim për qytetarët, Shehu ka deklaruar se pretendimet e AAK-së janë refuzuar në të gjitha instancat gjyqësore, duke përfshirë edhe PZAP-in dhe Gjykatën Supreme (vendimi AA.nr.100/2025).
Ai ka akuzuar AAK-në për fushatë propaganduese të ulët dhe për veprime kundër demokracisë dhe ligjshmërisë.
Postimi i plotë:
“Të dashur junikas,
Që nga 12 tetori deri më sot, AAK dega në Junik kanë zhvilluar një fushatë propaganduese të ulët, me ç’rast ata kanë tentuar të arsyetojnë dështimin e tyre në rundin e parë të zgjedhjeve.
Siç dihet, ata kanë bërë ankesë sa i përket listës së votuesve në Junik. Kjo ankesë e tyre është dy herë në PZAP. Ndërsa sot edhe Gjykata Supreme si instanca më e lartë gjyqësore në shtetin e Kosovës, ka publikuar vendimin AA.nr.100/2025 përmes të cilit po ashtu e ka refuzuar si të pabazuar ankesën e subjektit AAK dega në Junik. Me fjalë të tjera, pretendimet e tyre ankimore janë refuzuar në të gjitha instancat kompetente gjyqësore.
Propaganda e tyre sot morri përgjigjen e duhur gjyqësore. Ata nuk e dëshirojnë demokracinë dhe janë kundër ligjshmërisë. Prandaj kanë humbur jo vetëm zgjedhjet por edhe betejat gjyqësore.
Por duke i njohur taktikat e tyre të bërjes së politikës, nuk quditemi nëse ata do të gatuajnë edhe ndonjë propagandë tjetër nesër, duke qenë se kjo puna e mbiemrave duke përmendur vajzat dhe djemtë e junikasve nuk ju zgjati shumë.
Megjithatë, përgjigja e junikasve do të jetë më 9 nëntor në kutiat e votimit, pa çka se shumë përgjigje tjera do të marrin edhe nga organet kompetente ligjore. Deri atëherë kërkojmë nga të gjithë qytetarët e Junikut që të ruajnë qetësinë por edhe besimin e plotë në institucionet tona të drejtësisë.
Juniku është i junikasve. Asnjë propagandë nuk mund të rikthejë Junikun në vitet 2009-2021, periudha 12 vjeçare kur Juniku ka ngecur aq shumë sepse ka qenë nën kthetrat e atyrë që as nuk janë të Junikut dhe as nuk shqetësohen për nevojat e Junikut. Kjo epokë ka përfunduar përgjithmonë”.
