Renovimi i lokalit “Panda” në Pejë, Pergjegjaj kërkon hetim të menjëhershëm: Kush e autorizoi dhe e financoi?

Ish-i burgosuri i rastit “Panda”, Vllaznim Pergjegjaj, ka reaguar publikisht lidhur me renovimin e lokalit “Panda” në Pejë, duke kërkuar transparencë të plotë për personat dhe institucionet që kanë urdhëruar, autorizuar dhe financuar ndërhyrjet në këtë objekt.

Lokali “Panda” është vendi ku, në vitin 1998, u vranë gjashtë të rinj serbë. Për këtë rast, autoritetet e atëhershme serbe fajësuan UÇK-në dhe shqiptarët, ndërsa Përgjegjaj thekson se shumë shqiptarë të pafajshëm kanë vuajtur pasoja të rënda dhe burgosje lidhur me këtë rast.

Pas 28 vitesh, ai ngre pyetjen se kush ka dhënë urdhër për renovimin e këtij objekti dhe nëse punimet janë financuar me para publike.

“Nëse renovimi është bërë me para të shtetit të Kosovës, qytetarët kanë të drejtë të dinë se kush e pagoi dhe pse u lejua ndryshimi i këtij vendi”, thuhet në reagimin e tij.

Përgjegjaj kërkon që objekti të ruhet si dëshmi e historisë dhe e rrethanave që lidhen me rastin “Panda”, duke shprehur shqetësimin se ndryshimet në objekt mund të ndikojnë në ruajtjen e gjurmëve apo dëshmive që mund të jenë të rëndësishme për zbardhjen e plotë të së vërtetës.

Ai u ka bërë thirrje Prokurorisë dhe institucioneve kompetente që të nisin hetim të menjëhershëm.

“Unë, shokët e mi dhe shumë shqiptarë të pafajshëm kemi vuajtur rëndë në burgjet serbe për këtë rast. Prandaj nuk mund të heshtim”, shprehet Përgjegjaj.

Në fund të reagimit, ai thekson se rasti “Panda” nuk duhet të mbulohet apo të harrohet, duke kërkuar hetim dhe transparencë për çdo ndërhyrje të bërë në objekt.