Kryetari i Prishtinës, Përparim Rama, ka drejtuar akuza ndaj strukturave të Lëvizjes Vetëvendosje, duke thënë se ato qëndrojnë pas një aparati të organizuar dhe të financuar propagandistik që shënjestron gazetarët.
Reagimi i tij vjen pas sulmeve ndaj gazetarit Fidan Jupolli, për të cilat Rama ka thënë se janë pjesë e një dukurie më të gjerë të sulmeve ndaj përfaqësuesve të mediave.
Përmes një reagimi në Facebook, kryetari i kryeqytetit ka deklaruar se Jupolli nuk është gazetari i vetëm që është përballur me sulme të tilla.
“Fidani nuk është gazetari i vetëm. Një nga një janë sulmuar të gjithë ata që thonë të vërtetën në këtë vend”, ka shkruar Rama.
Ai ka kritikuar edhe përhapjen e mesazheve që, sipas tij, kanë nxitur kërcënime dhe thirrje publike për likuidimin e gazetarëve, duke i konsideruar të papranueshme veprime të tilla.
Rama ka kërkuar ndërhyrjen e institucioneve të drejtësisë për të identifikuar personat që qëndrojnë pas këtyre sulmeve, si dhe për të zbardhur mënyrën e organizimit dhe financimit të tyre.
“Organet e drejtësisë e kanë për detyrë të hetojnë kush janë këta njerëz. Kush i financon? Kush i organizon? Kush i nxit?”, ka shkruar ai.
Përmes këtij reagimi, Rama ka kërkuar që hetimet të mos kufizohen vetëm te personat që kryejnë sulmet, por të përfshijnë edhe ata që, sipas pretendimeve të tij, i organizojnë, i financojnë dhe i nxisin ato.
