Tri organizata sindikale të Radiotelevizionit të Kosovës (RTK) – Sindikata e Pavarur e RTK-së, Sindikata e Punëtorëve të RTK-së dhe Shoqata Sindikale e Radio Kosovës, kanë njoftuar se sot, në orën 12:00, do të protestojnë para objektit të transmetuesit publik.
Sipas një njoftimi të tyre, protesta organizohet si reagim ndaj mosalokimit të plotë të pagave për punëtorët e RTK-së.
“Ky veprim sindikal organizohet si reagim ndaj mosalokimit të plotë të pagave për punëtorët e RTK-së. Kërkesa kryesore e protestës është ekzekutimi i menjëhershëm i pjesës së mbetur të pagave dhe respektimi i të drejtave themelore të të punësuarve”.
“Pavarësisht kohës së mjaftueshme që kanë pasur organet drejtuese për të adresuar këtë çështje, deri më tani nuk është ofruar zgjidhje konkrete. Për pasojë, qindra punëtorë dhe familjet e tyre po përballen me vështirësi serioze financiare, duke mos qenë në gjendje të përmbushin obligimet dhe nevojat e përditshme”, theksohet në njoftim.
Këto sindikatat thonë më tutje se punëtorët nuk mund të mbajnë përgjegjësi për problemet financiare dhe organizative të institucionit, “as të jenë viktima të vendimeve apo mosveprimeve të strukturave drejtuese”.
“Sigurimi i pagës së fituar me punë është obligim themelor i çdo institucioni dhe nuk duhet të vihet në diskutim”.
