Policia e Shqipërisë po vijon kërkimet për gjetjen e 30-vjeçarit J.K., i cili “dyshohet se është marrë nga rrjedha e përroit të fshatit Dars, duke përfunduar në lumin Mat”.
Policia tha se “deri në këto momente, nuk është bërë e mundur gjetja e trupit të 30-vjeçarit”, ndërsa publikoi në Facebook një video nga kërkimet.
Njoftimi i Policisë së Shqipërisë:
Klos–Mat
Polumbarët e RENEA-s dhe shërbimet e Policisë vijojnë kërkimet në lumin Mat për gjetjen e 30-vjeçarit, shtetasit J. K.
Prej datës 10 janar 2026, polumbarët e RENEA-s vijojnë kërkimet për gjetjen e shtetasit J. K., 30 vjeç, i cili dyshohet se është marrë nga rrjedha e përroit të fshatit Dars, duke përfunduar në lumin Mat.
Në operacionin e kërkimit janë të angazhuar polumbarët e RENEA-s, Forcat Kombëtare të Sigurisë, Njësia Shkodër (FNSH), Forca e Posaçme “Shqiponja”, e Drejtorisë Vendore të Policisë Dibër, shërbimet e Komisariatit të Policisë Mat, Shërbimi i Mbrojtjes nga Zjarri dhe Shpëtimi, përfaqësues të Forcave të Armatosura, si dhe forca vullnetare, të cilët vijojnë krehjen e shtratit të lumit nga të dyja anët.
Deri në këto momente, nuk është bërë e mundur gjetja e trupit të 30-vjeçarit.
