Plenkoviq: Ia zbutëm frikën Serbisë për marrëveshjen mes Kosovës, Shqipërisë dhe Kroacisë

Kryeministri kroat Andrej Plenkoviq ka deklaruar se gjatë një takimi me presidentin serb Aleksandar Vuciq ka arritur t’ia zbusë frikën Serbisë lidhur me bashkëpunimin në fushën e mbrojtjes mes Kroacisë, Shqipërisë dhe Kosovës.

Duke folur për gazetarët në margjinat e një samiti për inteligjencën artificiale në New Delhi, Plenkoviq tha se i ka sqaruar Vuçiqit se bashkëpunimi ndërmjet ministrive të mbrojtjes së Kroacisë, Kosovës dhe Shqipërisë është i natyrës teknike dhe nuk është i drejtuar kundër Serbisë.

“Ua kemi larguar shqetësimet që kemi kuptuar se ekzistonin në Serbi sa i përket bashkëpunimit mes ministrive të mbrojtjes së Kroacisë, Kosovës dhe Shqipërisë. E kam sqaruar se ky bashkëpunim është i fokusuar në bashkëpunim teknik të resorëve tanë dhe në asnjë mënyrë nuk është i drejtuar kundër Serbisë. Nga ajo që pashë në deklaratën e tij, kjo është pranuar”, tha Plenkoviq.

Edhe Vuçiq deklaroi se ka zhvilluar një bisedë të gjatë me kryeministrin kroat, duke theksuar se për herë të parë kanë diskutuar për, siç e quajti ai, “aleancën ushtarake” mes Tiranës, Zagrebit dhe Prishtinës. Ai kishte thënë më herët, gjatë pjesëmarrjes në Konferencën e Sigurisë në Mynih, se kjo aleancë përbën kërcënimin më të madh për Serbinë.

Kroacia, Shqipëria dhe Kosova vitin e kaluar kanë nënshkruar një deklaratë për bashkëpunim në fushën e mbrojtjes dhe sigurisë, e cila synon forcimin e stabilitetit në Evropën Juglindore, mbështetjen e rrugës euroatlantike dhe thellimin e bashkëpunimit ndërmjet tri shteteve.