Gjatë konferencës për media në inaugurimin e pikës së përbashkët kufitare “One Stop Shop” në Qafë Thanë, kryeministri i Shqipërisë, Edi Rama, dhe kryeministri i Maqedonisë së Veriut, Hristijan Mickoski, u përballën me një pyetje të drejtpërdrejtë nga një gazetar.
Gazetari e pyeti kryeministrin Rama lidhur me marrëdhëniet e tij me krerët e qeverisë në Maqedoninë e Veriut. Ai shprehu pretendimin se Rama shfaqet shpesh në raporte miqësore me kryeministrat e këtij vendi dhe me Ali Ahmetin, por sipas tij, nuk tregon të njëjtin interes për shqiptarët që jetojnë atje dhe problemet me të cilat ata përballen.
Rama ndërhyri menjëherë duke e pyetur gazetarin: “Çfarë je ti, protestues?”. Më pas, ai shpjegoi se Maqedonia e Veriut është shtet sovran dhe se ai nuk ndërhyn në punët e brendshme të një shteti tjetër. Rama theksoi se shqiptarët në Maqedoninë e Veriut janë popull shtetformues dhe kanë të gjitha rrugët dhe mundësitë për t’u përfaqësuar përmes partive të shumta politike që ekzistojnë atje.




