Përleshje në Ferizaj, arrestohen pesë persona – njëri dyshohet se goditi me kaçavidë

Pesë persona janë arrestuar pas një përleshjeje fizike që ka ndodhur gjatë orëve të para të së martës në rrugën “12 Qershori” në Ferizaj, në afërsi të dy lokaleve

Policia e Rajonit të Ferizajt është njoftuar për rastin rreth orës 00:15, pas së cilës njësitet reaguese dhe ato të hetimeve kanë dalë në vendin e ngjarjes.

Si pasojë e përleshjes, tre persona kanë pësuar lëndime trupore. Njëri prej tyre, për shkak të natyrës së lëndimeve, pas trajtimit fillestar në Qendrën Emergjente në Ferizaj është dërguar për trajtim të mëtejmë në Qendrën Klinike Universitare të Kosovës (QKUK) në Prishtinë.

Gjatë hetimeve, në orët e hershme të mëngjesit policia ka arrestuar tre persona të dyshuar, ndërsa gjatë ditës janë arrestuar edhe dy persona të tjerë që dyshohet se kanë qenë të përfshirë në përleshje.

Sipas policisë, gjatë intervistimit njëri prej të dyshuarve ka pranuar se gjatë përleshjes ka përdorur një kaçavidë, me të cilën dyshohet se ka goditur njërin prej personave të lënduar.

Policia ka sekuestruar kaçavidën si provë materiale, ndërsa ka siguruar edhe një incizim të incidentit, i cili do t’i dorëzohet Prokurorisë Themelore si dëshmi.

Pesë personat e arrestuar janë D.A., 21 vjeç, E.A., 22 vjeç, A.N., 39 vjeç, O.A., 18 vjeç dhe A.A., 22 vjeç.

Personi i lënduar, SH.A., 33 vjeç, i cili po merr trajtim në QKUK, pritet të intervistohet nga hetuesit policorë pas stabilizimit të gjendjes së tij shëndetësore.

Për rastin është njoftuar prokurori i shtetit, i cili ka udhëzuar që ndaj të dyshuarve të iniciohet rast për veprat penale “Vrasje e mbetur në tentativë” dhe “Pjesëmarrje në rrahje”.

Me vendim të prokurorit, pesë të dyshuarit janë ndaluar për 48 orë.

Ndërkohë, hetimet po vazhdojnë me qëllim të identifikimit dhe përfshirjes së personave të tjerë të mundshëm që mund të kenë marrë pjesë në përleshje.