Behgjet Pacolli, ka reaguar pas protestës së sotme në mbështetje të ish-pjesëtarëve të UÇK-së që po përballen me procesin gjyqësor në Hagë.
Sipas Pacollit, koha kërkon më shumë se fjalë, kërkon punë dhe vepra.Ai theksoi se tani nevojitet angazhim konkret, përmes veprimeve institucionale, juridike dhe qytetare.
Postimi i plotë:
Të dashur protestues,
Ju që sot po ngrini zërin për çlirimtarët tanë në Hagë, po dëshmoni qytetari, solidaritet dhe përkushtim. Jeni një shembull i jashtëzakonshëm i njerëzve që nuk qëndrojnë indiferentë kur kërkohet drejtësi.
Por tani po hyjmë në një moment kur, krahas zërit tonë, nevojitet shumë punë.
Qëllimi ynë duhet të jetë një: drejtësia të vihet në vend.
Prandaj, lutja ime për secilin është që të punojmë praktikisht, me përgjegjësi dhe me shumë kujdes. Jo vetëm me fjalë, por me vepra. Me argumente, me angazhim institucional, juridik e qytetar dhe me çdo mjet demokratik që i shërben drejtësisë.
Ju keni treguar se zëri qytetar mund të dëgjohet. Tani duhet të tregojmë se dimë ta shndërrojmë këtë energji në punë konkrete, të mençur dhe të pandalshme.
Respekt për secilin prej jush që po qëndron me dinjitet dhe po kërkon drejtësi.
Koha kërkon më shumë se fjalë. Koha kërkon punë dhe vepra.
JO NË EMRIN TIM, AS TË QYTETARËVE TË VENDIT TIM!
