Pacolli: 15 milionë euro për menaxhimin dhe riciklimin e mbeturinave në Prishtinë

Ministrja e Mjedisit, Fitore Pacolli, ka bërë të ditur se menaxhimi i mbeturinave mbetet një nga prioritetet kryesore të ministrisë që ajo drejton.

Përmes një postimi, Pacolli ka njoftuar se në një takim me përfaqësues të Ministrisë Federale të Gjermanisë, Bankës Gjermane për Zhvillim (KfW) dhe Kompanisë për Menaxhimin e Deponive në Kosovë (KMDK), janë diskutuar sfidat e sektorit të mbeturinave dhe hapat drejt modernizimit të tij.

Ajo ka bërë të ditur se në kuadër të bashkëpunimit me Gjermaninë është diskutuar mbështetja prej 15 milionë eurosh për ndërtimin e një qendre moderne për menaxhimin dhe riciklimin e mbeturinave për rajonin e Prishtinës.

Po ashtu, në takim është diskutuar reformimi i sektorit dhe përafrimi i tij me standardet evropiane.

Pacolli ka theksuar se prioritet mbetet zgjidhja e problemit të deponisë së Prishtinës, ndërsa ka njoftuar se po punohet edhe në hartimin e ligjit të ri për mbeturinat dhe fuqizimin e KMDK-së.

Ajo ka bërë të ditur se për eliminimin e deponive ilegale janë ndarë një milion euro.