Nga UÇK-ja te FSK-ja – E vetmja gjeneralmajore Irfete Spahiu sot feston ditëlindjen

Sot feston ditëlindjen Gjeneralmajorja Irfete Spahiu, një nga figurat më të respektuara dhe më të rëndësishme në historinë moderne të institucioneve të sigurisë së Kosovës.

Rrugëtimi i saj jetësor dhe profesional është i lidhur ngushtë me vet historinë e Kosovës — nga periudha e luftës çlirimtare, deri te ndërtimi dhe forcimi i institucioneve shtetërore të sigurisë.

Gjeneralmajorja Irfete Spahiu ishte pjesëtare e Ushtrisë Çlirimtare të Kosovës në periudhën më të vështirë për vendin, duke kontribuar me përkushtim dhe vendosmëri në rrugën drejt lirisë së Kosovës. Pas luftës, ajo vazhdoi shërbimin në Trupat Mbrojtëse të Kosovës, duke qenë pjesë e brezit që punoi për organizimin dhe konsolidimin e strukturave të sigurisë në vitet e para të shtetformimit.

Me themelimin e Forcës së Sigurisë së Kosovës, ajo vazhdoi karrierën ushtarake me profesionalizëm të lartë, disiplinë dhe përgjegjësi institucionale, duke u ngritur në hierarkinë më të lartë ushtarake.

Emri i saj hyri përgjithmonë në histori si gruaja e parë në Republikën e Kosovës që mban gradën Gjeneralmajor — një arritje që konsiderohet jo vetëm sukses personal, por edhe moment historik për shtetin e Kosovës dhe për rolin e grave në institucionet e sigurisë.

Për shumë ushtarë dhe oficera, Gjeneralmajorja Irfete Spahiu mbetet simbol i udhëheqjes dhe profesionalizmit, ndërsa për shumë vajza dhe gra të reja ajo është frymëzim dhe dëshmi se puna, karakteri dhe përkushtimi tejkalojnë çdo barrierë .