“Nëna Rukë shpërtheu në lotë pas verdiktit ndaj katërshes së UÇK-së”

Rukë Haradinaj, nëna e dëshmorëve Shkëlzen e Luan Haradinaj, shpërtheu në lotë pasi e dëgjoi verdiktin dënues të trupit gjykues të Gjykatës Speciale ndaj katër ish-krerëve të UÇK-së, rrëfeu sot gazetarja Anita Haradinaj.

Anita, bashkëshortja e Ramush Haradinajt, tregoi sot se e përcolli seancën e djeshme të Gjykatës Speciale bashkë me vjehrrën e saj, nënën e dëshmorëve, Nënën Rukë.

“Unë e përcolla dje seancën bashkë me Nanën Rukë, ajo filloi të qajë. Iu ngrit tensioni shumë dhe aty i thash ty të kanë vdekë gjithë ata djemë – sepse ajo jo veç djemve të vet, por të gjithë ushtarëve të UÇK-së u thotë djemë të mi – i thash s’ke çka me bo”, tha ajo.

“Aty është gjykuar e gjithë lufta, jo vetëm ata katër individë”, vazhdoi Anita Haradinaj në një deklaratë në Klan Kosova.

Anita Haradinaj foli edhe për vështirësitë me të cilat ajo ishte përballur gjatë kohës kur ish-Komandanti i UÇK-së, Ramush Haradinaj, ishte mbajtur në paraburgim në Hagë ku ishte gjykuar për krime lufte. Haradinaj ishte shpallur i pafajshëm në përfundim të procesit dhe ishte liruar.