Musliu: Kurtit i konvenon një president “kukull”, thjesht që ulet në karrig, pa fuqi politike

Deputetja e zgjedhur e PDK-së, Ganimete Musliu ka kritikuar kryeministrin në detyrë Albin Kurti lidhur me qëndrimet e tij për zgjedhjen e presidentit të ardhshëm të Kosovës.

Musliu tha se Kurtit i konvenon një president me rol të kufizuar politik dhe pa ndikim në vendimmarrje.

“Albin Kurtit i konvenon me pas një president kukull, thjesht që ulet në karrigen e presidentit, por pa fuqi politike dhe pa fuqi vendimmarrëse. Ai këtë e proklamon si vazhdimësi”, ka thënë Musliu.

Ajo ka përmendur edhe raportet e Kurtit me ish-presidenten Vjosa Osmani, duke thënë se përplasjet mes tyre, sipas saj, kanë ardhur pikërisht për shkak të dallimeve rreth rolit të presidentit.

Musliu ka theksuar se presidenti i Kosovës, duke pasur parasysh sistemin politik të vendit, duhet të jetë figurë politike, me njohuri të politikave vendore dhe ndërkombëtare, si dhe të ketë kompetencë, autoritet dhe besueshmëri.

“Presidenti duhet të jetë i përgjegjshëm, kompetent, përfaqësues, reprezentativ dhe autoritativ. Kjo nuk i konvenon zotëri Kurtit”, është shprehur deputetja e PDK-së në Klan.

Sipas saj, Kurti dëshiron një figurë që nuk do të ketë peshë të madhe politike në postin e presidentit.

“Kurti do me pas një marionetë, siç e ka tash Albulena Haxhiun që e ka ushtruese të detyrës, dhe me i kryer punët e veta”, ka deklaruar Musliu.