Murati del me një interpretim pasi dështoi Kurti 3: Kryeministri ka thënë më testoni, në kuptimin që arrijeni qëllimin

Hekuran Murati foli për “xhelozi” dhe “inate politike” pasi qeveria e propozuar nga kryetari i Lëvizjes Vetëvendosje, Albin Kurti dështoi të zgjidhej – diçka e paprecedentë deri më tani në historinë parlamentare të Kosovës.

Deputeti i LVV-së tha se partitë e tjera po e bllokojnë edhe formimin e qeverisë – meqenëse s’duan të qeverisin me Kurtin – pavarësisht se më herët ishte konfident se do ta bënin shumicën e nevojshme në Kuvend.

“Ka një kohë të gjatë, prej datës 9 shkurt e deri më tani, dhe kryesisht me zvarritje dhe bllokada të shkaktuara, gjë që e pamë edhe sot që u materializua në formë të inatit dhe xhelozisë politike ku partitë opozitare vendosin të barrikadohen dhe më të vlefshme e konsiderojnë të barrikadohen dhe ta pamundësojnë që fituesi i zgjedhjeve të qeverisë me vendin, sesa ta vendosin interesin shtetëror përpara”, tha ai.

Kurti thoshte “më testoni”, ndërsa pas dështimit të sotëm, Murati dha një version ndryshe.

“Ka thënë kryeministri më testoni sepse akuza ka qenë që kryeministri Kurti dhe Lëvizja Vetëvendosje po e zvarrisin Kuvendin”, tha ai.

“Në këtë kontekst, kryeministri Kurti i ka sfiduar. U ka thënë ‘më testoni, nëse mendoni që nuk i kam numrat, kryejeni Kuvendin dhe arrini qëllimin që po dëshironi ta arrini, por unë nuk do të jem bllokuesi’”, tha Murati.

Por Kurti kishte theksuar se “i kemi votat” dhe se “posa të konstituohet Kuvendi e zgjedhim qeverinë e re”.