Konjufca ia konfirmoi besnikërinë me “bashkërrugëtofshim gjithmonë”, Kurti e falënderoi atë dhe partinë për “disiplinë”

Albin Kurti u propozua për kryeministër të vendit në një mbledhje të Lëvizjes Vetësvendosje.

Nënkryetari i LVV-së, Glauk Konjufca tha se do ta bëjnë qeverinë e re, ndërsa kryetarit të partisë ia konfirmoi besnikërinë duke ia thënë një urim që atij do t’i ketë pëlqyer: “bashkërrugëtofshim gjithmonë”.

“Deri tash, të gjithë ata që i kishim (kryeministra), dy prej tyre vetëm dy herë ishin kryeministra. Kësaj radhe do ta bëjmë Albin Kurtin për herë të tretë kryeministër të Republikës së Kosovës, sepse do ta kemi Qeverinë Kurti 3. Bashkërrugëtofshim gjithmonë!”, tha Konjufca.

Pasi e mori fjalën, Kurti i falënderoi bashkëpartiakët, ndërsa tha se u është “përjetë mirënjohës” që “e duan Lëvizjen dhe që nuk harrrojnë se i duhen asaj”.

Kurti, i cili u votua unanimisht si propozimi i LVV-së për kryeministër, i falënderoi bashkëpartiakët veçanërisht për disiplinë e përkushtim.

“Unë ju falënderoj për këtë disiplinë të zellshme, për këtë përkushtin të parreshtur”.

Ky konfirmim besnikërie vjen pak ditë pasi Liburn Aliu, një prej të parëve të LVV-së, dha dorëheqje nga pozita e ministrit të Mjedisit, i pakënaqur me sjelljen e partisë së tij në Kuvend, që e zgjodhi kryeparlamentar Dimal Bashën. Ai nuk është më as në strukturat e partisë.

Radio Evropa e Lirë shkroi para një jave se dy dekada pas themelimit, Lëvizja Vetëvendosje duket se po përjeton edhe një dridhje politike, me anëtarë “të rebeluar”.