KDI thirrje Kurtit të propozojë kandidatin për kryetar Kuvendi: Negociatat për president i vazhdoni pastaj

Instituti Demokratik e Kosovës kanë dalë me një reagim pasi sot LVV s’ka propozuar një emër për kryetar të Kuvendit. KDI thotë se dialogu politik mund të vazhdojë, por Kuvendi i Kosovës duhet të konstituohet.

Sipas KDI, mosushtrimi i së drejtës kushtetuese nga Vetëvendosje, si subjekti politik me numrin më të madh të deputetëve për të propozuar kandidaturën për Kryetar të Kuvendit pamundësoi vazhdimin e procedurës së konstituimit dhe rezultoi me ndërprerjen e seancës.

“Ndërprerja e sotme e seancës, përderisa afati kushtetues ende nuk ka përfunduar, nuk përbën në vetvete shkelje të afatit apo procedurave të parapara me Rregullore. Megjithatë, në përputhje me aktgjykimet e Gjykatës Kushtetuese të vitit të kaluar, rikujtojmë që seanca konstituive duhet të përmbyllet më së voni deri nesër, duke përfshirë zgjedhjen e Kryetarit dhe të pesë nënkryetarëve të Kuvendit”, thuhet në reagim.

KDI potencon mirëpret çdo përpjekje serioze për dialog dhe arritjen e marrëveshjeve politike ndërmjet subjekteve parlamentare.

“Megjithatë, nevoja për konsultime apo negociata politike nuk e pezullon detyrimin kushtetues për përmbylljen e seancës konstituive brenda afatit të përcaktuar. Dialogu politik dhe respektimi i afateve kushtetuese nuk e përjashtojnë njëri-tjetrin, por duhet të zhvillohen paralelisht”, potencon reagimi.

Në reagim të KDI-së thuhet se takimet dypalëshe, konsultimet më të gjera dhe format e tjera të komunikimit politik mund dhe duhet të vazhdojnë, veçanërisht për çështjen e zgjedhjes së Presidentit. Megjithatë, sipas tyre është e domosdoshme që fillimisht të përfundojë konstituimi i Kuvendit, në mënyrë që të nisin procedurat e tjera kushtetuese, përfshirë afatin 60-ditor për zgjedhjen e Presidentit.

“Afati që përfundon nesër është afati për konstituimin e Kuvendit, jo ai për arritjen e marrëveshjes për Presidentin. Po ashtu, ky afat është përcaktuar për përmbylljen e procedurës së konstituimit dhe jo për zhvillimin e negociatave politike. Pas konstituimit, subjektet parlamentare do ta kenë në dispozicion periudhën kushtetuese 60-ditore për të zhvilluar negociata dhe për të gjetur një zgjidhje që siguron zgjedhjen e Presidentit”, thuhet në reagim.

Në fund të reagimit KDI i bën thirrje Lëvizjes Vetëvendosje, si subjekti politik me numrin më të madh të deputetëve, që ta ushtrojë pa vonesë të drejtën dhe përgjegjësinë kushtetuese për ta propozuar kandidaturën për Kryetar të Kuvendit.

“Pas paraqitjes së kandidaturës, të gjithë deputetët kanë përgjegjësi të marrin pjesë në procedurën e votimit dhe të kontribuojnë në konstituimin e plotë të Kuvendit”, përfundon reagimi.