Kapet në kufirin e Shqipërisë shtetasi maqedonas, ishte në kërkim ndërkombëtar për prodhim e shitje narkotikësh

Policia e Shqipërisë ka njoftuar se një person i shpallur në kërkim ndërkombëtar nga autoritetet maqedonase, për prodhim dhe shitje të lëndëve narkotike, është kapur nga shërbimet e Policisë Kufitare Morinë.

Personi i kapur është K.E nga Shkupi.

“Si rezultat i kontrolleve dhe i verifikimeve në hyrje/dalje, me objektiv goditjen e paligjshmërive në kufi, si dhe ndalimin e shtetasve të shpallur në kërkim, të cilët tentojnë të lëvizin ilegalisht për t’iu shmangur përgjegjësisë penale, shërbimet e Policisë Kufitare Morinë, në bashkëpunim me shërbimet e DVP Kukës, kapën në hyrje të RSh-së dhe arrestuan me qëllim ekstradimin, shtetasin maqedonas:

-K. E., 35 vjeç, banues në Shkup”, njofton Policia.

“Nga verifikimet e kryera dhe nga informacioni i shkëmbyer me Interpol Tiranën, rezultoi se ky shtetas ishte shpallur në kërkim ndërkombëtar, pasi Prokuroria Publike e Shkupit i ka caktuar masën e sigurisë “Arrest në burg”, për veprën penale “Prodhimi i paautorizuar dhe shitja e lëndëve narkotike dhe psikotrope”.

Interpol Tirana, në bashkëpunim me homologët në Maqedoninë e Veriut, vijon procedurat për ekstradimin e 35-vjeçarit”, përfundon njoftimi.