Kandidati për kryetar të Suharekës nga Lidhja Demokratike e Kosovës, Ardian Shala gjatë ditës së sotme bashkë me deputeten Hykmete Bajrami kanë zhvilluar takime me gra të qytetit të Suharekës, shkruan GazetaDemos.
Gjatë këtyre takimeve u diskutua për sfidat dhe mundësitë e tyre në jetë e biznes, Bajrami po ashtu theksoi rëndësinë e fuqizimit të grave në vendimmarrje.
“Vizituam biznesin eksportues Dimali-Tex, në pronësi të znj. Mimoza Kuçi, që ka të punësuara mbi 60 gra dhe eksporton produktet e veta në Gjermani, si dhe biznesin Sofër n’Shesh, në pronësi të znj. Shqiponja Bujari – Berisha, që ka kthyer traditën e kuzhinës sonë në zemër të qytetit”, u shpreh Shala.
“Suhareka ka gra të guximshme e vizionare, shembuj frymëzues që na motivojnë të punojmë edhe më shumë për fuqizimin e tyre në jetën publike, sociale dhe ekonomike”, shtoi ai.
Postimi i plotë:
Rritja e rolit të grave në vendimmarrje
Sot, bashkë me znj. Hykmete Bajrami, dhe Forumin e Gruas të nëndegës, takuam shumë gra të qytetit të Suharekës me të cilat biseduam për sfidat dhe mundësitë e tyre në jetë e biznes. Deputetja Bajrami theksoi rëndësinë e fuqizimit të grave në vendimmarrje dhe bëri apel që të mos mbështeten ata që keqpërdorin taksat e qytetarëve.