Haziri: Veç bashkëpunimi për procese politike e normalizon dhe e stabilizon Republikën

Nënkryetari i Lidhjes Demokratike të Kosovës, Lutfi Haziri, ka deklaruar se bashkëpunimi ndërmjet partive politike është çelësi për normalizimin dhe stabilizimin e Republikës së Kosovës.

Ai tha se LDK-ja ka qenë gjithmonë forcë politike që ka nisur procese të rëndësishme dhe ka realizuar objektiva strategjikë për vendin

“Lidhja Demokratike e Kosovës është parti që ka shkaktu procese dhe ka realizu ëndrra. Ne e kemi mbajtë fjalën me të gjitha partitë për agjendën e Republikës. Ne jemi për bashkëpunim për procese politike, për normalizim e stabilizim të Republikës”, u shpreh Haziri.

Sipas tij, vendi nuk mund të dalë nga kriza politike nëse partia e parë nuk tregon gatishmëri për bashkëpunim.

Haziri bëri edhe krahasime me partitë e tjera politike, duke thënë se për të kuptuar se si shkaktohen proceset duhet pyetur PDK-ja, ndërsa për të kuptuar bashkëpunimin duhet pyetur AAK-ja.