U.d. presidentja e Kosovës, Albulena Haxhiu, ka shprehur ngushëllime për familjen e zyrtarit policor Altin Kryeziu, i cili humbi jetën pasi nuk arriti t’u mbijetojë plagëve të marra në një aksident gjatë kryerjes së detyrës.
Haxhiu e ka cilësuar vdekjen e Kryeziut si humbje të rëndë për familjen dhe Policinë e Kosovës, ndërsa ka bërë thirrje për më shumë kujdes dhe përgjegjësi në komunikacion.
Ajo ka shprehur solidaritet me familjen, kolegët dhe të gjithë ata që e njohën policin Kryeziu.
Postimi i plotë:
Më pikëlloi thellë lajmi për ndarjen nga jeta të zyrtarit policor Altin Kryeziu, i cili nuk arriti t’u mbijetojë plagëve të marra pasi u godit nga një automjet gjatë kryerjes së detyrës.
Sot, familja e tij humbi njeriun e dashur, ndërkaq Policia e Kosovës një koleg dhe pjesëtar të saj që detyrën e kishte zgjedhur si shërbim ndaj të tjerëve.
Vdekja e Altinit është edhe një kujtesë e dhimbshme se në komunikacion një çast pakujdesie mund t’ia marrë jetën dikujt dhe t’ua ndryshojë përgjithmonë jetën shumë të tjerëve. Prandaj, kujdesi në rrugë dhe përgjegjësia ndaj njëri-tjetrit janë para së gjithash përgjegjësi ndaj jetës së njeriut.
Familjes Kryeziu i shpreh ngushëllimet e mia më të sinqerta. Bashkëndiej me kolegët e Altinit në Policinë e Kosovës dhe me të gjithë ata që e njohën, punuan me të dhe sot e kujtojnë me dhimbje.
Qoftë i përjetshëm kujtimi për të.
