Gaxherri: LDK nuk e lejon Albin Kurtin ta ketë edhe presidentin – s’mund t’i ketë të gjitha në duart e tij

Ish-deputetja e LDK-së, Besa Gaxherri, ka thënë se janë të gatshëm për bashkëpunim për zgjidhjen e bllokadës për zgjedhjen e presidentit.

Gaxherri tha se me Albin Kurtin është gati e pamundur të qeverisësh. Mirëpo, siç thotë ajo, kontributi i tyre për presidentin mund të bëhet edhe pa përfshirje në qeverisje. Gaxherri kërkoi reflektim nga Kurti për të arritur marrëveshje politike, sepse sipas saj nuk mund t’i ketë një subjekt politik tri institucionet qendrore.

“LDK-ja është e gatshme të kontribuojë për të zhbllokuar krizën e stërzgjatur në vend, por duke pasur parasysh edhe pasojat si subjekt politik, sepse ne nuk mund ta mohojmë atë çfarë kemi thënë dje dhe për të cilën jemi të bindur se të qeverisësh me LVV-në është shumë e vështirë, gati e pamundshme. Por, duke pasur parasysh situatën në të cilën kemi ardhur me sjelljen e zotit Kurti, mendojmë se jemi të gatshëm të kontribuojmë. Nuk është e thënë që domosdoshmërish të jemi në qeverisje. Por, natyrisht, Kurti duhet të reflektojë dhe ta dijë se nuk mund t’i ketë të gjitha institucionet e shtetit në duart e tij. Këtë nuk do ta lejojmë ne si subjekte politike, nuk e lejon as vetë Kushtetuta e Kosovës. Kushtetuta parasheh që të ketë balancë të pushteteve dhe bashkëpunim midis partive politike, të ketë marrëveshje politike gjëra që zoti Kurti nuk i njeh, dhe kjo është për të ardhur keq. Kam bindjen se Kurti po krijon këto kriza, sepse vetëm kështu ai mund të funksionojë.”, tha Gaxherri për rtv21.

Anëtarja e LDK-së, Besa Gaxherri, po ashtu tha se LDK-ja nuk ka votë për asnjë kandidat të LVV-së për president nëse nuk ka marrëveshje politike.

“Kurti po përgatit skenarë si zakonisht dhe po e përgatit elektoratin, duke i paketuar mashtrimet e tij se ai deshi të bëjë zgjidhje, por partitë opozitare nuk ishin të gatshme. Unë uroj dhe shpresoj se qytetarët e këtij vendi tashmë e kanë parë lojën e Kurtit. Unë besoj se vendi duhet të shkojë në zgjedhje në qershor. Nuk mund të ketë votë nga LDK-ja pa marrëveshje politike. Kurti duhet të mësohet të bëjë marrëveshje politike, duhet të mësohet të respektojë opozitën, mediat dhe sindikatat. Kurti pretendon ta kapë shtetin.’’, u shpreh Gaxherri.