FSK përgatit snajperistë profesionistë për ngritjen e kapaciteteve luftake

Pjesëtarë të Forcës së Sigurisë së Kosovës (FSK) kanë përfunduar një trajnim të specializuar në qitje në distanca të largëta, me qëllim rritjen e kapaciteteve luftake të forcës.

Ky trajnim synon certifikimin e pjesëtarëve si snajperistë profesionalë operativë, të aftë të përdorin kalibra të ndryshëm sipas standardeve moderne ushtarake. Përmes këtij procesi, FSK forcon gatishmërinë dhe profesionalizmin e ushtarakëve të saj në nivel të lartë.

Ministri në detyrë i Mbrojtjes, Ejup Maqedonci, theksoi rëndësinë e zhvillimit dhe specializimit të ushtarakëve për të siguruar mbrojtjen efektive të vendit, duke vlerësuar përkushtimin e pjesëtarëve gjatë trajnimit.

FSK vazhdon të investojë në avancimin profesional dhe teknologjik të njësive të saj, duke rritur kapacitetet për të përmbushur detyrat e sigurisë në përputhje me standardet më të larta.