Familja Kryeziu është distancuar publikisht nga deklaratat e ish-nënkryetarit të Gjykatës Kushtetuese të Kosovës, Kadri Kryeziu, për fenë islame në Kosovë.
Në një paraqitje të tij, Kadri Kryeziu kishte deklaruar se “Feja islame në Kosovë ka dalë nga shtrati, ka vërshuar nga shtrati”, duke shtuar se, sipas tij, është koha që dikush ta ndalë këtë “vërshim”.
Në reagimin e vëllait të tij, Bedri Kryeziu, thuhet se familja Kryeziu “distancon veten nga deklarata e papjekur e Kadri Kryeziut”, duke e cilësuar atë si nxitëse të tensioneve fetare në vend.
“Te nderuar qytetarë, Ne, familja Kryeziu, distancohemi publikisht nga deklarata e papjekur e vëllait tonë, Kadri Kryeziu. Fatkeqësisht, me këtë deklaratë, ai nxit tensione fetare mes komuniteteve të ndryshme në Kosovë, duke u ngritur kundër fesë Islame, ku sipas statistikave 94% e popullsisë janë myslimanë, dhe e fton këtë komunitet për revansh.
Kjo shkel ligjet e Republikës së Kosovës, ligje për të cilat ai vetë ka qenë pjesëmarrës dhe bashkë-hartues. Si politikan, ai deklaron se jemi shtet laik, por në praktikë përzihet në çështje fetare, duke treguar injorancë totale dhe mungesë njohurie, pasi nuk ka lexuar asnjë faqe për fe”, thuhet në reagim.
Familja Kryeziu gjithashtu i ka kërkuar falje komunitetit mysliman për fyerjet që mund të jenë shkaktuar nga kjo deklaratë dhe ka ftuar institucionet e drejtësisë që të veprojnë në përputhje me ligjet që mbrojnë tolerancën fetare në vend.
