Ekstradohen në Kosovë dy të kërkuar me urdhërarrest ndërkombëtar

Policia e Kosovës ka njoftuar se janë ekstraduar në Kosovë dy shtetas kosovarë të kërkuar me urdhërarrest ndërkombëtar.

Sipas njoftimit, Drejtoria për Bashkëpunim Ndërkombëtar Policor, në koordinim me njësitë relevante të Policisë së Kosovës dhe institucionet e drejtësisë, ka realizuar ekstradimin e personave me inicialet L.V. (1990) dhe A.M. (1991). Njëri prej tyre është ekstraduar nga Gjermania, ndërsa tjetri nga Franca, falë bashkëpunimit me autoritetet e këtyre dy shteteve.

Të dyshuarit ishin arrestuar nga autoritetet gjermane dhe franceze, pasi kërkoheshin me urdhërarrest ndërkombëtar të lëshuar nga institucionet e drejtësisë së Republikës së Kosovës.

Ata dyshohen për përfshirje në vepra penale të ndara dhe për shmangie nga drejtësia.

Pas ekstradimit, të dyshuarit u janë dorëzuar njësive përkatëse të Policisë së Kosovës në rajonet e Prishtinës dhe Gjilanit, për vazhdimin e procedurave të mëtejme ligjore.