Është ndarë nga jeta mësimdhënësja Valbona Abazi, e cila ishte pjesë e stafit arsimor të Shkollës Fillore dhe të Mesme të Ulët “Emin Duraku” në Shtime.
Lajmin e ka bërë të ditur vetë shkolla përmes një telegrami ngushëllimi, në të cilin ka shprehur dhimbjen për humbjen e koleges së tyre.
Në njoftimin e publikuar, drejtoria dhe kolektivi i shkollës kanë vlerësuar lart përkushtimin e saj në profesion, dashurinë për nxënësit dhe kontributin e dhënë ndër vite në arsim.
“Me dhimbje të thellë morëm lajmin për ndarjen nga jeta të koleges sonë të dashur, mësimdhënëses Valbona Abazi. Valbona do të kujtohet gjithmonë për përkushtimin ndaj profesionit, dashurinë për shkollën dhe nxënësit, si dhe kontributin e çmuar që dha ndër vite”, thuhet në telegramin e ngushëllimit.
Sipas shkollës, mësimdhënësja Abazi ka lënë gjurmë të pashlyeshme në kolektiv, ndërsa kujtimi për të do të mbetet i gjallë te kolegët dhe komuniteti shkollor.