Gjashtë persona janë arrestuar në Tiranë, tre të tjerë janë proceduar penalisht, ndërsa dy janë shpallur në kërkim, pas akteve të dhunës të regjistruara gjatë protestës së zhvilluar një ditë më parë.
Sipas Policisë, gjatë tubimit protestuesit kanë kundërshtuar dhe sulmuar punonjësit e rendit me sende të forta, lëndë piroteknike, bomba molotov, sfera dhe vida metalike.
Gjatë protestës është bllokuar edhe qarkullimi rrugor, ndërsa janë djegur kazanë të mbeturinave.
Në mesin e të arrestuarve janë A. Sh., 26 vjeç, L. K., 18 vjeç, F. Ç., 38 vjeç, K. R., 35 vjeç, një shtetas i huaj dhe dy të mitur. Gjatë kontrolleve, Policia ka gjetur dhe sekuestruar bomba molotov në posedim të dy prej të arrestuarve.
Hetimet janë zhvilluar nën drejtimin e Prokurorisë, ndërsa autoritetet po vazhdojnë punën për identifikimin e personave të tjerë të përfshirë dhe dokumentimin e plotë të ngjarjeve.
Materialet procedurale janë referuar në Prokurori për disa vepra penale, përfshirë “Vrasjen e punonjësit të Policisë”, të mbetur në tentativë, “Kundërshtimin e punonjësit të Policisë”, “Prishjen e qetësisë publike”, “Shkatërrimin e pronës me zjarr” dhe “Pengimin e qarkullimit të mjeteve të transportit”.
