Ka nisur këtë të enjte seanca plenare e Kuvendit të Shqipërisë, me fjalën hapëse të kryeparlamentarit Niko Peleshi.
Në nisje të seancës, Peleshi iu referua vendimit të Dhomave të Specializuara të Kosovës ndaj katër ish-liderëve të Ushtrisë Çlirimtare të Kosovës, duke bërë të ditur se Kuvendi i Shqipërisë do të miratojë një deklaratë lidhur me këtë çështje.
Ai tha se deklarata po përgatitet nga Komisioni për Çështjet Europiane dhe Punët e Jashtme, ndërsa pritet të përcjellë qëndrimin e Kuvendit të Shqipërisë për vendimin e Hagës.
“Të nderuar kolegë. Para se të fillojmë me rendin e ditës, dje Dhomat e Specializuara të Kosovës shpallën vendimin ndaj katër liderëve të UÇK-së. Ky vendim përbën një vendim të rëndësishëm dhe të dhimbshëm, jo vetëm për Kosovën, por dhe për historinë dhe kujtesën tonë kombëtare. Sot do të përcjellim një deklaratë të përbashkët nëpërmjet Kuvendit, ku do të shprehim mendimin e Kuvendit të Shqipërisë për këtë vendim. Komisioni për Çështjet Europiane dhe Punët e Jashtme po finalizon detajet e deklaratës”, tha ndër të tjera Peleshi.
