Analisti politik Ilir Deda ka reaguar për zhvillimet e fundit politike në vend, duke theksuar se një aleancë politike nuk duhet të nënkuptojë heshtje përballë shkeljeve të Kushtetutës apo abuzimeve institucionale.
Deda, përmes një postimi publik, ka shkruar se interesi i vendit duhet të mbrohet mbi çdo interes partiak apo institucional.
“‘Aleanca politike’ nuk nënkupton heshtje gjatë shkeljeve të Kushtetutës, heshtje kur linçohen kritikët, heshtje përgjatë abuzimit institucional. Ruajtje ‘si sytë e ballit’ meriton veç interesi i vendit, jo formacionet partiake apo bartësit institucional”, ka shkruar Deda.
Ai ka kritikuar edhe mënyrën se si, sipas tij, është trajtuar çështja e mandatit të dytë të presidentes, duke thënë se kjo situatë ka dëmtuar politikën partiake.
“Loja politike me mandatin e dytë të presidentes veç shpërfytyroi politikën partiake që bazohet vetëm në interes për aq kohë sa partitë kanë nevojë për të. Reagimet emocionale u mbesin votuesve që me çdo kusht refuzojnë të jenë mendjeftohtë dhe të kuptojnë që politika s’ka asgjë të bëjë me dashuri”, ka theksuar ai.
